Skip to content

Te Whakauru Whānau Hou

Whanaungatanga

I te tamaiti e whakaurutia ana ki roto i Te Kōhanga Reo, ko te here i te whānau ki te rapunga whakaaro o Te Kōhanga Reo, ā, i whakataukītia te hiranga o te tomo atu ki roto i ana mahi. Ko te momoho o ngā mahi a te kōhanga i whakamauru i runga i ēnei kaupapa e rua. Ko ngā tino whakataunga katoa, nā te whānau, ā, ko te mea tino nui, he tautoko i ngā mema o te whānau. E wātea ana te whānau, tae atu ki te whānau whānui, ki te noho i Te Kōhanga Reo i te taha o te tamaiti. Ki tā Ka’ai (1990) e kitea noatia ana he pai ake te hau o ngā pakeke i ērā o ētahi atu wāhi whakaako kōhungahunga. Ko te ariā ko te mahana me te manaakitanga.

I hiahiatia ngā mātua kia whakaatu i ō rātau hapū me ō rātau hononga iwi, me tā rātau whakaae ki te atawhai i te rironga mai o te reo Māori i te tamaiti i roto i te kāinga, me te tautoko hoki i te whānau ki ngā whakamahere a te kōhanga. He maha ngā whānau i kite ko Te Kōhanga Reo te ara tautoko mō rātau, i a rātau e mahi ana. Ko te manaaki i te tamaiti i hoatu ki ngā kaiako me ngā kuia nā rātau i ārahi ērā atu pakeke i roto i Te Kōhanga Reo i ngā āhuatanga e tika ana ki ngā ahurea Māori (Makereti, 1986), nā te mea ko te whakaaro e hiranga ana, me hōatu te mātauranga me te whakaaronui o ngā kaumātua ki te kōhungahunga i roto i tōna tamarikitanga.

Ko te nuinga o ngā uara pēnei i te aroha, i te atawhai, i te manaakitanga, i te wairua hoki, me ako ki te tamaiti, ā, me whakahauhau a ia ki te mahi i ēnei i te taha o ētahi atu tamariki. Ko ngā uara o te atawhai o tētahi ki tētahi, me te mahi tahi, i akona hei wāhanga hira o te whanaungatanga (Hohepa, 1990; Ka’ai, 1990; Pere, 1991)

I whakahautia anō hoki ngā tamariki kia atawhai i ngā kōhungahunga i roto i te kōhanga reo mā te awhiawhi, mā te āwhina ā-tinana, mā te whakaāhuru i a rātau mehemea rātau ka tino āwangawanga. Ko tēnei te ariā o te tuakana/teina (Hohepa, 1990; Ka’ai, 1990), i reira ka ākona te tamaiti pakeke ake ki te kawenga mō te atawhai o te tamaiti tamariki iho, te teina, i roto i te whānau. Nā tēnei āhuatanga atawhai i mea te tamaiti pakeke ake kia neke mai i te āhuatanga o te ākonga i roto i te kōhanga reo, ki tērā o te kaiako, kaitaurima rānei mō te tamaiti tamariki ake.


He mea tango mai i Te Puāwaitanga o te Reo Māori. Te Rūnanga o Aotearoa mō te Rangahau i te Mātauranga 1997.